Donostiako Udalak hainbat neurri hartu ditu San Juan bezperarako, muturreko tenperaturengatiko alerta meteorologikoaren eta baso-sutearen arriskuagatiko abisuaren, Eusko Jaurlaritzako Segurtasun Sailak larrialdi-fasearen deklarazioaren (LABIren 0 egoera) eta Udal Larrialdi Planaren larrialdi-fasearen aktibazioaren aurrean:

    • Finka pribatuetan San Juan suak eta erreketak debekatuko dira.
    • Udaltzaingoak aurreko debekua betetzen dela zaintzeko eta kontrolatzeko lanak indartuko ditu.
    • Hiri-eremuan bakarrik egin ahalko diren su publikoen segurtasun-neurriak indartuko dira (suhiltzaileen udal zerbitzuak aldez aurretik ikuskatuko ditu su publikoak).
    • Udaleko Babes Zibilak informazio-alertak bidaliko ditu SMS bidez eta posta elektronikoz, harpidetza bidezko alerta-zerbitzuaren bidez. 

Tenperatura altuetarako beste gomendio batzuk 

    • Aire zabaleko berotik babestu 
        ◦ saihestu eguneko erdiko orduetan eguzkitan egotea.
        ◦ ez jarri inoiz zuzenean eguzkitan 6 hilabete baino gutxiagoko haurtxoak.
        ◦ erabili kapela, eguzkitako betaurrekoak eta eguzki-babes egokia.
        ◦ jantzi arropa arina, lasaia eta transpiragarria.
        ◦ saihestu jarduera fisiko bizia egitea, batez ere tenperatura handieneko uneetan.
        ◦ kontsultatu osasun-langileekin sintoma hauek agertzen badira: ahulezia, nekea, zorabioak, goragalea, ikusmen lausoa edo ordubetetik gora irauten duten alditxarrak.

    • Etxea fresko mantendu 
        ◦ itxita eduki leihoak eta pertsianak bero gehien egiten duen orduetan.
        ◦ gauez etxebizitza aireztatu, gelak freskatzeko.
        ◦ saihestu eguneko erdiko orduetan beroa sortzen duten etxetresna elektrikoak erabiltzea.
        ◦ haizagailuak kontuz erabili, 35 ° C-tik gora ez baitute gorputzeko tenperatura murrizten.
        ◦ freskatu ur hotzeko dutxa edo bainuekin, edo zapi hezeak erabilita aurpegian eta eskuetan.
        ◦ ezin bada etxebizitza fresko mantendu, igaro egunean 2-3 ordu klimatizatutako lekuetan, esaterako, eraikin publikoetan.

    • Deshidratazioa saihestu 
        ◦ edan maiz ura eta likidoak, egarri izan arte itxaron gabe.
        ◦ saihestu kafeina, alkohola edo azukre asko duten edariak, deshidratazioa errazten baitute.
        ◦ handitu fruta, barazki eta entsaladen kontsumoa gatz mineralak berritzeko.
        ◦ saihestu berora egokitzea zailtzen duten otordu oparoak, koipetsuak edo astunak.

    • Pertsona zaurgarrienak zaindu 
        ◦ arreta berezia eman haurtxoei, adingabeei, haurdun edo edoskitzaroan dauden emakumeei, adinekoei eta gaixotasunak dituztenei.
        ◦ ez utzi inoiz inor ibilgailu itxi batean, ezta itzalean ere.
        ◦ zaindu bereziki bakarrik bizi diren edo mendekotasuna duten adinekoak, haiek egunean behin gutxienez bisitatuta.

Informazio gehiago >