​​​​​​Tokiko Gobernu Batzarrak Donostiako Udalaren eta ADIF elkartearen arteko hitzarmena onartu du gaur, Atotxako geltokiko estalkia urbanizatzeko eta, horrela, Tabakalerako plaza donostiarrek erabiltzeko eta gozatzeko gune berde bihurtzeko. Bi erakundeek beharrezko hitzarmena sinatu dute eraikuntza-proiektua idazteko eta, ondoren, Atotxako geltokirako sarbideak hobetzeko jarduketak eta estalkia urbanizatzeko 2. fasea gauzatzeko, betiere trenbide-azpiegituraren funtzionaltasunarekin, ustiapenarekin eta segurtasunarekin bateragarria dela bermatuz.

Hitzarmenaren helburua da Donostiako Udalaren eta ADIFen arteko lankidetza- eta koordinazio-araubidea ezartzea eta zehaztea, honako hauek bermatzeko:

1. Atotxako geltokirako bideen eta oinezkoen sarbideak hobetzea, hiriaren mendebaldetik.
2. Urbanizazioa bateragarria izatea trenbide-lauzaren egiturarekin eta haren azpian dauden azpiegiturekin.
3. Trenbide-instalazioen ustiapen-, mantentze-, segurtasun- eta irisgarritasun-baldintzak errespetatzea.
4. Ondoriozko espazio publikoaren hiri-, paisaia- eta funtzio-integrazio egokia lortzea.

Jon Insausti alkateak pozik hartu du hitzarmena sinatzea, eta berretsi du "urrats hau donostiarren bizi-kalitatea hobetuko duten proiektuak abiarazteko eta aktibatzeko erakundeen arteko agendan iragarri dugun bizkortzearen ondorio" dela. Hitzarmen honek Donostia aurrera doala berresten du eta aliantzak bultzatzen jarraituko dugu hiriaren etorkizunaren eraikuntza geldi ez dadin".

Gaur onartutako hitzarmenaren arabera: 

• ADIFek obrak eta horiei lotutako laguntza teknikoak egiteko kostuaren % 100 finantzatuko du (4.616.150 euro), bai eta proiektua idazteko kostuaren % 50 ere (245.017,70 euro).
• Donostiako Udalari dagokio proiektua idazteko kostuaren % 50 finantzatzea (245.017,70 euro). Horrela, hitzarmenaren xede diren jarduketen kostu zenbatetsita 5.106.185,41 eurokoa da (BEZa barne).

Hitzarmenari aurre egiteko, Udalak irailean 217.800 euroko konpromiso-kredituak onartu zituen 2027rako eta 193.600 eurokoak 2028rako.