Arabako, Bizkaiko eta Gipuzkoako 30 musika eta dantza eskola baino gehiagotako 1500 ikasle inguru elkartuko dira Legazpin, aurten Doinua Musika Eskolak antolatutako Musikaldia topaketan. Ekitaldiak euskal kulturaren eta hezkuntza artistikoaren erakusketa zabala eskainiko du.

2026ko Musikaldia 10:00etan hasiko da, ekitaldiaren aurkezpenarekin, Euskal Herria plazan. Ondoren, kontzertuen aurretik eta ondoren, instrumentuen kalejira egingo da, herriko kaleak girotuz. Musikaldik bost gune izango ditu Legazpin zehar banatuta: Euskal Herria plaza, Urbeltz pilotalekua, Kale Nagusia, Agirre-Etxeberri (Musika Eskola) eta Laubideko oinezkoen gunea. Gune horietan, 10:30etik 14:30era bitartean, musika eta dantza emanaldi ugari eskainiko dira.

Aurten, EHMEren (Euskal Herriko Musika eta Dantza Eskolen Elkartea) ohorezko saria Azkoitiko Musika Eskolako zuzendari ohiak, Mari Jose Arregik, jasoko du. Arregi funtsezko figura izan da autonomia erkidegoan, emakume konpositoreen lanak tradizionalki maskulinoa izan den esparru batean ikusarazteko, eta ezinbesteko erreferente bihurtu da sortzaileen belaunaldi berrientzat. Gainera, bi urte barru Musikaldi 2028 antolatuko duen herriak hartuko du lekukoa.

Donostiako Udalaren Musika eta Dantza Eskolako 40 ikaslek parte hartuko dute festa honetan. Ekitaldi instituzionalaren ondoren, Donostiako Udalaren Musika eta Dantza Eskolako Triki eta Pandero taldeak eta Euskal Dantza taldeak kontzertua eskainiko dute Laubideko oinezkoen pasealekuan, bi kalejiratan, 10:00etan eta 13:30ean. Euria egiten badu, Bikuña plazako arkupeetara lekualdatuko dira. Saxofoi taldea, Ibon Irijoaren zuzendaritzapean, Laubideko oinezkoen pasealekuan ere arituko da 10:30etatik aurrera.