Donostia Kirolak kirol inklusiboa bultzatuko du, 'Denok jokoan' programaren lehen edizioarekin

Programak sentsibilizazio-jarduerak, erakustaldiak, kirol-jarduera irekiak eta lehiaketak konbinatuko ditu, herritar guztiei kirol egokitua ezagutarazteko

2026/11/18 argitaratua

Donostia Kirolak Denok jokoan programaren lehen edizioa jarri du abian. Programa hori kirol inklusiboa ikusarazteko, desgaitasuna duten pertsonen parte-hartzea sustatzeko eta herritar guztientzat irisgarria izango den kirol-jarduera baterantz aurrera egiteko helburuarekin sortu da.

Ekimena Gipuzkoako Kirol Egokituen Federazioarekin elkarlanean sustatu da, eta hainbat modalitatetako kirol-eragileek parte hartu dute. Askatuak, Konporta, Bera Bera, Fortuna, Hernani Rugby, Ostadar, Atzegi eta Kemen klubak batu dira ekimenera, eta baita Gipuzkoako futboleko eta boleiboleko federazioak ere. Gainera, programak Salto Foundation eta Rural Kutxa Gizarte Ekintzaren babesa du, Rural Kutxak Donostia Kirolarekin duen lankidetza-hitzarmenaren esparruan. Akordio horren bidez, bi erakundeek elkarrekin lan egiten dute kirolari eta ongizateari, inklusioari eta gizarte-kohesioari lotutako ekimenetan.

Jarduera-programa

Azaroaren 21ean, larunbatean, Denok jokoan jardunaldia izango da. Jarduera-programa zabala antolatu da egun horretarako, Anoetako hainbat kirol-instalaziotan.

Goizean, Anoetako miniestadioan:

  • Futboleko eta errugbiko jarduerak egingo dira. 
  • Parte-hartzaile guztiek martxa bateratu bat egingo dute miniestadioaren inguruan.
  • Martxaren ondoren, hamaiketako osasungarria eskainiko du Bedu Avatak.

Programazioarekin jarraituz, Anoetako Kirol Hirian prestatutako kirol-espazioetan, herritarrek hartubola (boleibol egokitua), esgrima egokitua eta gurpil-aulkiko saskibaloia (okasiorako prestatutako 3x3ko kantxan) ezagutu eta praktikatu ahal izango dituzte. 

Goizeko programazioa 13:30ean amaituko da, Paco Yoldi kiroldegian, zumbaton inklusiboarekin. Parte hartzeko jai-proposamen bat da, pertsona guztiei irekia, kirola, musika eta mugimendua partekatzeko.

Arratsaldean:

  • Atano III.a frontoian, Gipuzkoako Slalom Txapelketa egingo da.
  • Jardunaldia Gasca kiroldegian amaituko da, Gasteizko Salto Bera eta Zuzenak taldeen arteko gurpil-aulkiko saskibaloi-ligako partida ofizial batekin.

Programazioak, azken batean, sentsibilizazioa, kirol-hastapena, jarduera irekiak eta parte-hartzaileak eta lehiaketa uztartzen ditu, kirol inklusibo eta egokituak gaur egun dituen askotariko dimentsioak erakusteko eta kirolarien, ikasleen, familien, kluben eta herritarren arteko topagune bat sortzeko.

Kiroleko eta Bizitza Osasungarriko zinegotzi Iñaki Gabarainek nabarmendu duenez, «Donostia Kirolarentzat lehentasuna da kirola eta jarduera fisikoa pertsona guztientzat izatea. Helburu horretan aurrera egiteko, ezinbestekoa da erakundeek kirol-kudeaketa inklusiboa sustatzea, baina baita lan hori egiten duten klub, federazio eta erakundeekin lankidetzan aritzea ere. Denok jokoan konpromiso horren eta indartzen jarraitu nahi dugun aliantza-sarearen adierazpena da». «Garrantzitsua da ikastetxeetan horrelako ekimenak bultzatzea, inklusioa haurtzarotik ere ikasten eta eraikitzen da eta. Haurrek errealitate desberdinak ezagutzea nahi dugu, esperientziak partekatzea eta ulertzea kirolak espazio ireki bat izan behar duela, pertsona guztiei leku egingo diena».