​​​​​​Topoaren geltoki berria azaroaren 21ean irekiko denez, bihartik aurrera, ostirala, hilak 13, zamalanetarako ibilgailuen zirkulazioa berrantolatuko da Loiola kalean eta horren ingurunean, banaketa ibilgailuen eta oinezkoen arteko bizikidetza egokia bermatzeko.

Azpiegitura berria martxan jartzeak aldaketa handia ekarriko du hiriguneko oinezkoen mugikortasunean, batez ere goizeko lehen orduetan, garraio publikoaren erabiltzaileen joan-etorriak ohiko banaketa jarduerarekin bat etorriko baitira.

Oinezkoen segurtasuna bermatzeko, maniobra arriskutsuak saihesteko eta banaketa-jarduera baldintza egokietan mantentzeko, Mugikortasun Departamentuak Loiola, Arrasate eta San Martzial kaleetako zirkulazioaren berrantolaketa diseinatu du.

Segurtasuna bermatzeko zirkuitu bat

Neurri nagusia izango da zamalanetarako baimendutako ordutegian (8:00etatik 11:00etara) eremura sartzen diren ibilgailu komertzialentzat ibilbide bakarra eta nahitaezkoa ezartzea.

Horrela, ibilgailuak

• Hondarribia kaletik Arrasaterantz sartu beharko dira
• Loiolarekiko elkargunera iristean, eskuinera jo beharko dute nahitaez
• handik Loiola kaletik jarraituko dute San Martzial kaleraino
• bertan eskuinera biratu beharko dute Hondarribira itzultzeko

Antolamendu horri esker, norabide bakarreko zirkulazio-zirkuitu bat ezarri ahal izango da, bira arriskutsuak eta atzerako martxako maniobrak saihestuz, horiek, aurreikusitako oinezkoen hazkundearekin, arrisku-egoerak sor baititzakete.

Hori betetzen dela bermatzeko, seinale bertikalak eta horizontalak indartuko dira, nahitaezko biraketa-seinaleak jarriz eta beharrezko puntuetan igarotzea debekatuz. Ezarpenaren lehen jardunaldietan informazio- eta pedagogia-kontrola egingo da.

Gogorarazten da, gainera, zamalanak egiten dituzten ibilgailuei bakarrik emango zaiela sarbidea, ez, ordea, inguruan lan egiten duten gremioetako ibilgailuei, hauek 2 tarifako TAO erreserbetan aparka baitezakete.

Topoaren irekieraren ondorengo jarraipena eta ebaluazioa

Aldaketak behin-behinekoak izango dira hasiera batean. Geltoki berriaren funtzionamenduko lehen asteetan, jarraipen bat egingo da inguruan, oinezkoen fluxuek eta zamalanen funtzionamenduak nola eboluzionatzen duten egiaztatzeko.

Emaitzen arabera, espazio horren erabileren arteko bizikidetza hobetzeko egokitzapenak egiteko edo neurri osagarriak hartzeko beharra baloratuko da.