Ontziteria abiatzeko hilabete eskas falta dela, Donostiako Erreal Klub Nautikoak gaur aurkeztu ditu Donostiako Udaletxean Armada Cup – Plymouth – Donostia / San Sebastián – Vicente Munilla Memoriala nazioarteko estropadaren VII. edizioaren azken xehetasunak, baita probari lagunduko dion herritarrentzat irekitako jarduera-programa ere. Estropada uztailaren 18an abiatuko da Plymouthetik (Erresuma Batua), eta 460 itsas milia egingo ditu Mantxako Kanala zeharkatuz, Donostiako uretan helmuga-marrara iritsi arte. Kantauri itsasertz osoko itsas zabaleko estropada bakarra da.

Armada Cup, lehen aldiz 1986an antolatu zena, Plymouth eta Donostiaren artean 1984an sinatutako senidetze-akordioaren ondoren, Donostiako Erreal Klub Nautikoaren eta Royal Western Yacht Club of England klubaren eskutik itzultzen da, Donostia – San Sebastián Hiria Nazioarteko Estropada – Vicente Munilla Memorialaren ko-antolakuntzarekin. Edizioa, gainera, Donostiako Erreal Klub Nautikoaren 130. urteurrenaren ospakizunarekin bat dator.

Herritar guztientzat irekitako programa

Edizio honen berrikuntzetako bat proiektua itsas lehiaketatik harago eramateko nahia da, publiko guztientzat irekitako proposamen batekin, kirol, kultura eta itsas sektoreko eragileekin elkarlanean garatua, itsasoa eta estropaden kultura herritarrengana hurbiltzeko.

Programa ekainean eta uztailean zehar garatzen da:

• Ekainaren 13an, Aquariumean, 17:00etan, The Weekend Sailor filmaren proiekzioa aurreikusita dago, Bernardo Arsuagak zuzendua.
• Ekainaren 18an, Donostiako Erreal Klub Nautikoan, 19:00etan, Armada Cupeko beste edizio batzuetako regatistekin mahai-ingurua egingo da, Roberto Ramajok moderatua eta Pablo Munillarekin.
• Ekainaren 25ean, Donostiako Erreal Klub Nautikoan ere eta 19:00etan, «Okendoren galeoia Donostiako uretan» hitzaldia izango da, Francisco Javier Sánchez Cacaceren eskutik. Eta ekainaren 30ean Cáscara de Nuez dokumentala proiektatuko da Antzoki Nagusian, Miguel Ángel Tobíasek zuzendua.

Ekaineko azken astean, Why Not Fundazioarekin eta Gautenarekin elkarlanean —Gipuzkoan lan egiten duen Autismoaren Espektroko Nahasmenduak dituzten pertsonen senideen elkartea—, bela egokituko itsas bataio bat programatu da.

Uztailean:

• Programak hilaren 2an jarraitzen du «Plymouth – Donostia / San Sebastián: Erdi Aroko Atlantikoko itsas ibilbide erabakigarria» hitzaldiarekin, Xabier Alberdik, Euskal Itsas Museoko zuzendariak, museoan bertan emango duena 19:00etan.
• Uztailaren 9tik aurrera, Donostiako Erreal Klub Nautikoaren Areto Urdinean, «Bela arina Donostian» argazki-erakusketa bisitatu ahal izango da, Nacho Martínezek komisariatua.

Ontziteriaren iritsiera-aurreikuspenarekin bat eginez, uztailaren 20 eta 24 bitartean, jarduera berriak programatu dira:

• Uztailaren 22an, 17:00etatik 19:00etara, Euskal Itsas Museoak ontzigintzako haur-tailerra hartuko du.
• Uztailaren 23an, 18:30ean, badian agur ofiziala aurreikusita dago parte-hartzaileen ontziei, Armadako ontzi baten eta RCNSSeko Bela eta Piragua Eskolako ontzien laguntzarekin, tokiko ontziteria osoari irekitako harrera batean.
• Uztailaren 24an regatistei pintxo-ibilaldia eskainiko zaie portuan, baxurako ontzi baten bisitarekin, baita Elkano-Urdaneta. Ozeanoen aurkikuntza erakusketara bisita gidatua ere Euskal Itsas Museoan, eta herritarrei irekitako Aita Garayoa Abesbatzaren kontzertua, kaiko San Pedro elizan.
• Programazioa Vicente Munillari omenaldia egiteko regatisten afari ofizialarekin amaitzen da, uztailaren 24an 20:00etan Donostiako Erreal Klub Nautikoan egingo dena,
• eta Armada Cup 2026ko sarien harrera eta banaketarekin, uztailaren 25ean 19:00etan Donostiako Udaletxean aurreikusita dagoena.

Armada Cup – Plymouth – Donostia / San Sebastián estropadaren antolakuntzaren ardura Donostiako Erreal Klub Nautikoak eta Royal Western Yacht Club of England klubak dute, mende bateko bi itsas erakunde. Donostia – San Sebastián Hiria Nazioarteko Estropada – Vicente Munilla Memorialak ko-antolatzaile gisa jarduten du, eta ekitaldiak Donostiako Udalaren, Donostia Kirolaren, Euskadiko Kirol Portuen (EKP) eta Gipuzkoako Foru Aldundiaren erakunde-babesa du.

Halaber, jarduera paraleloen programazioan eta estropadaren antolakuntzan lagundu dute, bela federazioekin batera, hainbat erakundek: Donostiako Aquarium, Euskal Itsas Museoa, Kofradia - Itsas Etxea, SS Shops, Itsas Kapitaintza, Donostiako Itsas Komandantzia, Armada, Blas de Lezo LHII, Keler eta Trek.