Emakumezkoen pilotako 3 Hiriburuak txapelketa arrakastatsuan inspiratuta, Eusko Jaurlaritzaren bultzadarekin eta Euskal Herriko hiru hiriburuen babesarekin sortu da 3 Hiriburuak Laboral Kutxa MTB.

Donostiako hitzordua, estrategia eta talde-lana uztartzen dituen lehiaketaren lehen atala izango da. Parte-hartzaileek 3 edo 4 txirrindulariz osatutako taldeetan lehiatuko dira, eta txandaka arituko dira hiru orduan ahalik eta itzuli gehien osatzeko.

Uliako zirkuitua, mendiko bizikletaren esentziaz

• Ulia mendian egingo da Donostian prestatutako zirkuitua.
• Gutxi gorabehera 3 kilometroko luzera izango du.
• Mendiko bizikletaren esentziari eutsiko dio.
• Maila desberdinetako parte-hartzaileentzat kirol-erronka irisgarria eskainiko du.
• 3 Hiriburuak Laboral Kutxa MTBren erakargarritasun nagusietako bat da esperientzia eta sasoi-maila desberdinetako txirrindulariak talde berean elkartzeko aukera.

Estrategiak, beraz, funtsezko zeregina izango du: talde bakoitzak erabaki beharko du nor sartzen den lasterketan eta noiz egiten den txanda bakoitza, erritmoari eutsi eta ahalik eta itzuli gehien pilatzeko helburuarekin. Emaitza baliozkoa izan dadin, talde bakoitzeko gutxienez hiru kidek itzuli bat osatu beharko dute.

Donostiako Udaleko Kiroletako eta Bizitza Osasungarriko zinegotzi Iñaki Gabarain-ek gaurko prentsaurrekoan nabarmendu duenez, «ekimen hau beste adibide argi bat da Donostiak emakumeen kirolaren alde duen konpromisoarena. Izan ere, gure hiria erreferente nagusia da emakumeen kirolaren sustapenean. Oraingoan ere, Euskal Autonomia Erkidegoko hiru hiriburuen arteko lankidetzaren aldeko apustua egiten dugu, emakumeen pilotarekin eta 3 Hiriburuak pilota txapelketarekin egin dugun bezala. Aliantza hori indartzen eta proiektu berriekin jarraitzea espero dugu».