Donostia Kirolak Auzo Kirola jarri du abian, Donostiako auzoetan kirolaren inguruko proiektu parte-hartzaileak sustatzea helburu duen programa berria. Kirol eta gizarte eragileen eskutik, Donostia Kirolak baliabideak eta laguntza teknikoa bideratuko ditu jarduera fisikoa edo kirola ardatz nagusi edo elementu garrantzitsutzat duten baina haratago doazen herritarren ekimenetara, osasunarekin, inklusioarekin, kulturarekin, hezkuntzarekin edo hiri birsortzearekin lotutako helburuak lortzeko.

"Kirola gizartea eraldatzeko tresna oso boteretsua da, eta programa hau indar eta aukera horiek aprobetxatzeko bokazioarekin sortu da, auzoetan proiektu zehatzekin lan eginez, betiere kirol eta gizarte sarearekin lankidetzan", azaldu du Iñaki Gabarain Kiroletako eta Bizitza Osasungarriko zinegotziak.

Lehen urratsak

 “Hamaika Emakume, Hamaika Erronka” erakusketa Intxaurrondon

Donostia Kirolak dagoeneko eman ditu lehen urratsak Auzo Kirolarekin. Duela gutxi, Intxaurrondo Kultur Etxearekin eta auzo bereko Emakumeen Elkartearekin elkarlanean, Mendi Urruzuno argazkilariaren "Hamaika emakume, Hamaika erronka" erakusketa egin du, feminismoaren eta kirolaren arteko harremana aztertzeko, eta 4.500 euroko aurrekontua jarri du horretarako.

 Zumba familian jaialdia Estibausen

Era berean, joan den apirilaren 11n, Altzako Estibaus frontoian zumba jaialdi bat egin zen gazte, haur eta familientzat, auzoko Haurtxoko eta Gaztelekuarekin lankidetzan. Ekimena Jarduera Fisikoaren Munduko Eguna ospatzeko antolatu zen, eta Donostia Kirolak 3.000 euro bideratu zituen ekimen horretarako.

 Bidebieta pilotalekua lehentasunez erabiltzeko akordioa

Auzo Kirolak bere kirol ekipamenduak helburu komunitarioekin erabiltzearen inguruko lankidetzak ere aurreikusten ditu. Hori da, hain zuzen ere, Bidebieta auzoko Mendiola Ikastetxearekin egin berri den akordioaren kasua, ikastetxeak pilotalekutik gertu dagoen frontoia lehentasunez erabiltzeko.

Hurrengo proiektuak

 Antiguako Pilota Topaketak

8 eta 13 urte bitarteko haurrekin eta adin guztietako emakumeekin egindako lau topaketako zikloa da, esku pilota sustatzeko.

Apirila eta azaroa bitartean egingo da, eta bi hilean behin topaketa bat egingo da Antiguako eta Ibaetako frontoietan. Halaber, Urrezko Pilota sariaren azken topaketan kirol, kultura edo zientziako pertsona ospetsu bati emango zaio.

Topaketa bakoitzean 40 eta 50 haur artean eta haien gurasoak, Donostiakoak zein Gipuzkoakoak, elkartuko dira, eta jarduera ludikoak (zozketak, txokolatadak, musika) eta pilotari profesional ezagunak ere izango dira.

Jardueraren sustatzailea Antiguako Pilota Kluba – Izurun da, eta 5.000 euro bideratuko dira jarduera horietara.

 Arrobitxuloko bolatokia eta Euskadiko Txapelketa hobetzea

Arrobitxulon (Herrera) dagoen Bolatokia kirol diziplina minoritario baina tradizio handiko batentzat instalazio berezia da.

Euskadiko Txapelketa Bolatoki honetan maiatzaren 31n jokatzea aurreikusita dago. Txapelketa hau 2008an egin zen azkenekoz Donostian.

Horretarako, instalazioa hobetzeko lanak egingo dira, eta horrek, txapelketaren antolaketarekin batera, 17.000 euroko gastua eragingo du.

 Hiri-kirolak Blas de Otero plazan

Gipuzkoa Basket Fundazioaren eta Donostia Kirolaren arteko lankidetzatik abiatuta, ekainaren 27, 28 eta 29an Egiako Blas de Otero Plazan egingo den Kalean Urban Fest kirol eta hiri kulturaren jaialdia antolatzeko, bi erakundeek akordio bat lortu dute, urtean zehar leku horretan hiri kirolen ekitaldiak antolatzeko, hainbat talderekin batera, gune hori berreskuratzen laguntzeko. Jarduera horietarako 15.000 euro inguru erabiliko dira.

 Esku-hartze artistikoa Juan Carlos Guerra plazako kirol anitzeko pistan (Bidebieta)

Ekainean, Juan Carlos Guerra plazan dauden kantxa horietan esku-hartze artistikoa eta kirola egingo dira. Mikel Herrero (Innovart) artistaren eta inguruko grafitigileen eskutik, espazio horretan esku hartuko da, nortasun propioa emateko eta auzoarekin duen lotura handitzeko. Ekintza hau Basket Kalean taldeak antolatutako 3x3ko txapelketa batekin osatuko da. Guztira, 8.000 euro bideratu dira ekimen horretara

Iñaki Gabarainaren arabera, "proiektu multzo honek oso ondo erakusten du Auzo Kirolaren barietatea, programa horrek aukera emango baitigu eragile desberdin askorekin lan egiteko, proiektu zehatzekin eta eremuari lotuta, eta, aldi berean, koherentzia eta ikuspegi orokorragoarekin. Donostia Kirolaren apustu estrategikoa da ".