Donostiako Udalak Perueneko baranda konpontzeko lanak amaitu ditu, kamioi baten istripuaren ondorioz kalte larriak izan baitzituen. Joan den astean egin ziren konponketa-lanak, eta horri esker:

• tarte horretako segurtasuna erabat berreskuratu
• eta azpiegitura indartu ahal izan da, haren erresistentzia hobetzeko.

Konponketa-lan horien bidez, talkak eragindako 60 metroko baranda berreraiki da; era berean, Txingurri pasealekuaren azpiko pasabideraino doan zatia berrikusi eta konpondu da. Azken zati horretan, hainbat soldadura-puntu errepasatu eta deformatuta geratu ziren hainbat hodi zuzendu dira.

Gainera, hanka bikoitzeko lau bereizketa berri jarri dira, egitura osoari zurruntasun handiagoa emateko eta haren egonkortasuna areagotzeko. Jarduketaren kostua 20.000 euro ingurukoa izan da, BEZa barne.

Aseguru-etxeekin administrazio- eta kudeaketa-izapide guztiak bete ondoren, konponketa egin ahal izan da, eta eremua ahalik eta lasterren ireki ahal izan da.

Egitura indartu da

Hiri Mantentze eta Zerbitzuetako zinegotzi Iñigo Garcíaren ustez, “jarduketa hori beharrezkoa zen eremu horretan segurtasun-baldintzak lehenbailehen berrezartzeko, istripuaren ondorioz kaltetuta geratu baitzen”. Era berean, honako hau adierazi du: “erasandako eremua berreraikitzeaz gain, jarduketa aprobetxatu dugu egitura indartzeko, horrela, haren portaera eta iraupena hobetzeko”.

Garcíak balioa eman nahi izan dio udal-zerbitzuek konponketa ahalik eta azkarren egiteko egindako lanari. “Gure helburua da horrelako gorabeheren aurrean azkar erantzutea, herritarrei ahalik eta erasan gutxien sortzeko eta espazio publikoak egoera onean mantentzen direla bermatzeko” adierazi du.