Donostiako Udalak Frantzia pasealekuko zuhaitzak zaintzeko eta kudeatzeko zenbait jarduera egingo ditu laster. Lanak honako hauek izango dira: ezkien kimaketa neurritsua, egonkortasun arazoak dituzten zenbait ale ordezkatzea eta gune enblematiko horretako zuhaitz eta palmondo guztien gaineko kontrol teknikoak egiten jarraitzea.

Frantziako pasealekua hiriko berdegune ezagunenetako bat da. Ezkien lerrokatze bikoitzak landare galeria bat osatzen du, eta horrek pasealekuaren nortasuna definitzen du. Gainera, ingurumen onura garrantzitsuak ditu: itzala ematen du, tenperatura altuen eragina murrizten du, airearen kalitatea hobetzen du eta inguruan egunero ibiltzen diren pertsonen ongizatea hobetzen du.

Hiri Antolamenduko Plan Orokorrak babesten duen zuhaitz multzo hori, gainera, Donostia erdialdeko klimaren babesleku nagusietako bat da.

Iñigo Garcia Hiri Mantentze eta Zerbitzuetako zinegotziak nabarmendu duenez, “Frantzia pasealekua Donostiaren ondare berdearen eta identitatearen parte da. Gure helburua hamarkada askotan zehar kontserbatzea da eta, hori lortzeko, beharrezkoa da ekintza teknikoak, planifikatuak eta zuhaitz bakoitzaren biologiarekiko errespetuzkoak egitea”.