Donostiako Udalak, Hiri Mantentze eta Zerbitzuetako Zuzendaritzaren eta Parke eta Lorategien Atalaren bitartez, Frantzia pasealekuko lorategiak erabat berrituko ditu. Proposamenak 'Jardín del Destello/Lorategi Distiratsua' izena du, non landareak ez diren apaingarri hutsak, mugitzen ari den uraren eta haren distiren abstrakzio bat baizik.

Jarduketa erabat luzetarakoa izango da, eta lorategi-zerrenda osoan egingo da (350 metro). Paisaia bizia, dinamikoa eta konposizio zurrunetatik urrun dagoena planteatzen du proposamenak.

Ziklo naturala besarkatzen duen paisaia

Sistema natural bizia denez, lorategi horiek hainbat egoera izango dituzte urtaroaren arabera: udaberrian leherketa kromatikoko uneak egongo dira, sasoiko 7.700 landare eta 4.564 erraboil-landare loratuko direlako; beste une batzuk, berriz, lasaiagoak izango dira, lore gutxiago egongo baitira eta landareek tonalitate ahulagoak eta lehorragoak izango baitituzte. Hala ere, urte osoan, lorategiek beren kohesioari eta izaerari eutsiko diote.

Hiri Mantentze eta Zerbitzuetako zinegotzi ordezkari Iñigo García Villanuevak adierazi duenez, "esku-hartze integral bat egin nahi dugu, punta-puntakoa, Frantzia pasealeku osoari irudi bateratua eta berritua emateko. Landaketa askoz ere naturalagoa izango da, eta hainbat espezie, altuera eta testura izango ditu. Urtean zehar eboluzionatzen eta aldatzen joango da".

Lanak urriaren amaieran hasiko dira, eta udazkenean hiriko gainerako eremuetan egiten diren landaketekin batera egingo dira.