Hiriko festa eta auzo gehiagotara zabalduko da eraso sexisten aurkako kanpaina
Informazio eta arreta gune gehiago izango dira hiriko jaietan, herritarren eskura prebentzio-neurriak eta baliabideak jartzeko
2026/06/18 argitaratua
Donostiako Udaleko Berdintasun Bulegoak jai-giroko eraso sexistak eta sexualak prebenitzeko eta artatzeko kanpainaren beste edizio bat jarri du abian. 'Festetan ere aske! Indarkeria sexistarik ez!' lelopean, ekainetik abendura bitartean egongo da kanpaina indarrean, eta hiriko ospakizun nagusietan nahiz auzoetako jaietan eramango da aurrera.
Kanpainaren helburua da eraso sexisten aurkako prebentzio-mezuak zabaltzea, emakumeen eta gizonen arteko berdintasuna sustatzea eta indarkeria matxistaren edozein adierazpenen aurrean gaitzespen-jarrera aktibo bat sustatzea. Era berean, informazioa eta baliabideak eskaini nahi ditu, bai indarkeria-egoerak prebenitzeko, bai erasoren bat jasan duten pertsonei laguntzeko.
Etxez etxe informazioa banatuz hasiko da kanpaina: hain zuzen ere, gomendioak eta jarduteko jarraibideak helaraziko dira. Gainera, informazio- eta sentsibilizazio-materialak banatuko dira, euskaraz, gaztelaniaz, ingelesez eta frantsesez. Informazio guztia ezezetzda.eus webgunean dago jasota.
Puntu moreak
Informazio- eta arreta-guneak hainbat ospakizunetan egongo dira. Puntu horietan, informazioa, sentsibilizazioa eta arreta espezializatua eskainiko dira. Leku hauetan egongo dira:
| FESTAK | EGUNAK | ORDUTEGIAK | KOKAPENA |
|---|---|---|---|
| Antiguako San Joanak | Ekainak 20, larunbata | 20:00 – 00:00 | Mikel Laboa plazan |
| San Joan Bezpera | Ekainak 23, asteartea | 20:00 – 00:00 | Puente de Zurriola |
| Intxaur Jaiak | Ekainak 26, ostirala | 22:00 -02:00 | Sagastieder plaza |
| San Martzial (Altzak) | Ekainak 27, larunbata | 20:00 - 00:00 | San Martzial |
| Añorgako karmengo jaiak | Uztailak 11, larunbata | 20:00 - 00:00 | Harrobi plaza (frontoi ondoan) |
| Karmengo jaiak | Uztailak 18, larunbata | 00:00 - 04:00 | Boulevardeko kioskoa |
| Zipotz Jaiak | Uztailak 18, larunbata | 20:00 - 00:00 | Katalunia plaza |
| Jazzaldia | Uztailak 22, 23, 24 eta 25 | 20:00 - 00:00 | Zurriolako zubia |
| Amara Zaharreko jaiak | Uztailak 30, asteazkena | 20:00 - 00:00 | Easo plaza |
| Aste Nagusia | Abuztuaren 8tik 15ra | 11:00 - 15:00 20:00 - 04:00 |
Boulevardeko kioskoa |
| Intxaurrondo Zaharreko jaiak | Irailak 12, larunbata | 20:00 - 00:00 | Letaman plazan |
| Euskal Jaiak | Irailak 13, igandea | 11:00 - 15:00 | Boulevardeko kioskoa |
| Porrontxo jaiak | Irailak 18, 19, 20 | 20:00 - 00:00 | Martin Santos plaza |
| Arriaga Serafinak (Altzan) | Irailak 26 | 20:00 - 00:00 | Harrobieta plaza |
| Amara Berriko jaiak |
Urriak 9, ostirala | 20:00 - 00:00 | Zehazteke |
| Martuteneko jaiak | Urriak 10, larunbata | 20:00 - 00:00 | Zehazteke |
| San Tomas | Abenduak 21 | 11:00 - 15:00 | Boulevardeko kioskoan |
Ostalaritza
Kanpainak, gainera, prestakuntza- eta hausnarketa-prozesu bat egingo da ostalaritzako profesionalekin, indarkeria-egoerak prebenitzeko eta horiei erantzuteko gaitasuna indartzeko. Lanak ikuspegi zabala izango du, eta LGTBIQ+fobiarekin, arrazakeriarekin, dibertsitate funtzionalagatiko diskriminazioarekin eta beste indarkeria eta bazterketa mota batzuekin lotutako egoerak ere jorratuko ditu.
Udalak jaien antolaketan eta kudeaketan inplikatutako hainbat eragilerekin koordinatuta egin du kanpaina hori, besteak beste, Donostia Festak atalarekin, Jazzaldiarekin, Udaltzaingoarekin eta auzoetako jai-batzordeekin, jai-espazio seguruak, berdinzaleak eta indarkeria sexistarik gabekoak eraikitzen jarraitzeko.
