Tokiko Gobernu Batzarrak onartu dituen gaiak

Isuri Gutxiko Eremua, Kontxako Baranda, Alkolea parkea, Eguzki-instalazio fotovoltaikoak, Zuhaizti Eskola, Haur-parkeak

Mugikortasun Plana eta Isuri Gutxiko Eremua

Tokiko Gobernu Batzarrak behin betiko onartu ditu Erdialdeko Isuri Gutxiko Eremua proiektua (proiektuan bertan jasotzen diren eremuaren, epeen, helburuen eta baimenen ezaugarriekin) eta 2024-2029 Donostiako Hiri Mugikortasun Jasangarriaren Plana.

Era berean, hasierako onarpena eman dio Airearen kalitatea hobetzeko eta klima aldaketa arintzeko eta Donostiako isuri gutxiko eremua arautzeko udal ordenantza proiektuari.

Kontxako baranda

Tokiko Gobernu Batzarrak Kontxa pasealekuko - Errege-etxearen eta Antiguako tunelaren artean kostaldeko hormaren hegala konpontzeko eta handitzeko (II-C fasea), proiektua onartu du, 989.373 euroko aurrekontuarekin.

Oro har, II-C faseari dagokion proiektuaren xedea da baranda, botaolak eta harrizko piezak berritzea, eta Kontxako pasealekuaren zabalera osoan zoladura berrezartzea, II-B fasearen amaieraren eta EGUZKI elkartearen eraikinaren arteko ingurunean.

Alkolea parkea

Tokiko Gobernu Batzarrak behin-behinean onartu du Hiri Antolamenduko Plan Orokorraren Aldaketa Puntuala, Alkolea parkearen transformazio-azpiestazioari eta eta Martuteneri buruzkoa, alegazio bat onartuz. Alegazio horren arabera, espaloiak egin beharko dira bai Marrus Bidean, bai Uba Bidean.

Udalak formulatutako dokumentuaren helburu nagusia da lurzatian, transformazio-instalazioaren erabilera osagarri gisa, eraikin berri bat ezartzea, Gipuzkoako hornidura elektrikoko sareko bulegoak eta beste zerbitzu orokor batzuk zentralizatzeko ahalmena izango duena, gaur egun lurralde horretan banatuta dauden horien unitate txikiak ordezkatzeko. Horrekin, egiten duen zerbitzu publikoa nabarmen hobetzea espero du.

Lurzatian "sestra gaineko" hiru altuerako eraikin bat egitea planteatzen da (beheko solairua, lehen solairua eta bigarren solairua), 4.500 m2-ko azalera eraikia bulego eta bestelako zerbitzuetarako, "sestra azpiko" solairu bat ibilgailuak eta biltegiak aparkatzeko, 1.500 m2-ko azalera duen aparkaleku batekin.

Eguzki-instalazio fotovoltaikoak

Tokiko Gobernu Batzarrak onartu du 102 kWn-eko banakako eta taldeko autokontsumorako 3 eguzki-instalazio fotovoltaiko instalatzeko, legeztatzeko eta martxan jartzeko proiektua:

• 1. lotea: Ikasbide Ikastola – Loiolako Erriberak
• 2. lotea: Orixe Ikastola – Zuloaga
• 3. lotea: Zurriola Maritimo

Obrak egiteko 8 hilabeteko epea aurreikusi da, eta proiektuaren aurrekontua 139.860 €-koa da. Sare elektrikoan kontsumitutako energia elektrikoa 99.249 kWh aurreztuko da, eta 20 tn CO2 gutxiago isuriko da. Urtean 23.000 euro inguru aurreztuko dira, zergak barne.

Zuhaizti Eskolaren birgaitze energetikoa

Tokiko Gobernu Batzarrak Zuhaizti Eskolako (Biteri eraikina, San Frantzisko kalea, 7) fatxadetako inguratzaile termikoaren birgaitze energetikorako egikaritze proiektuan jasotako obren kontratazio espedientea onartu du. Lizitazioaren aurrekontua 564.187 €-koa da eta gauzatzeko epea 6 hilabetekoa.

Lanek eraikinaren sestra gaineko fatxadei dagokien inguratzailearen birgaitze energetikoa hartuko dute barne, eta honako jarduketa hauek egingo dira:

• Fatxada aireztatua, pieza zeramikoekin eta artile mineralaren isolamendu termikoarekin.
• Argizulo berriak, emisio gutxiko beira bikoitzekin eta eguzki-kontrolarekin.
• Markesina eraikinera sartzeko atean.

Haur-parkeak

Tokiko Gobernu Batzarrak hiriko lau haur-parke ordezteko eta berritzeko kontratazioari buruzko espedientea onartu du. Lizitazio-aurrekontua 246.450 eurokoa da lote guztietarako, eta gehienez ere 16 asteko epea izango du lote bakoitzerako:

• 1. lotea: Aiete pasealekua, 8 (71.711 euro)
• 2. lotea: Gurutzealde (59.958 euro)
• 3. lotea: Igeldo plaza (38.636 euro)
• 4. lotea: Erregezaintza 32-34 (76.145 euro)