Gabonak zuretzat programak 400 jardueratik gora eskainiko ditu

Abenduaren 13tik urtarrilaren 6ra

Gabonak zuretzat 2023

Gabonak zuretzat programa, beste behin ere, Donostiara iritsi da. Aurten, abenduaren 13tik urtarrilaren 6ra 400 jarduera baino gehiago eskainiko ditu haurrentzat, familientzat eta gazteentzat. Hala, hiritarrek eskaintza zabala izango dute Gabonetan: besteak beste, hainbat tailer, magia ikuskizun edota antzezlan. Donostia Gazteriak egitaraua diseinatu du hiriko hainbat elkarte, aisialdi talde, Donostia Kultura eta bestelako eragilerekin elkarlanean.

Azken batean, kontsumismoari iskin egiten dion kulturaz eta aisiaz disfrutatzeko ekintza mordoa izango dira hiriko hainbat auzotan.

Egitaraua online egongo den eskuliburu batean, atalka, bilduta egongo da:

• haurrak (0-11 urte) eta familientzako jarduerak alde batetik: Haurren programazioa
• eta, bestetik, gazteentzako direnak (12-30 urte):Gazteentzako programazioa
• Horrez gain, www.donostia.eus/gazteria web orrian bilatu daiteke informazioa.

Irudiari dagokionez, programaren aurtengo identitate grafikoa Usandizaga Ikastetxeko Diseinu Grafiko Goi mailako Heziketa Zikloaren eta Donostia Gazteriaren arteko elkarlanari esker sortutakoa da.

Diseinu Zikloko 1. mailako ikasleek 15 lan proposatu dituzte. Proposatutako diseinuen artean Maria Nuñezek egindakoa izan da hautatua. Irudiak programa iragarriko du euskarri desberdinetan, sare sozialetan, Donostiako autobusetako markesinetan, Dbuseko pantailan, flyerretan etab, abenduaren 12tik aurrera.