Tokiko Gobernu Batzarrak Aste Nagusi bete-betean onartu ditu etxerik gabeko pertsonei eskainitako otordu kopurua handitzeko dirulaguntzak. Hala, hemendik aurrera 416 menu banatuko dira egunero hirian, Gizarte Ekintzako udal sailak finantzatutako baliabideen bitartez, orain arte baino 100 gehiago hain zuzen ere. 

Horrela, Udalak erantzun nahi izan dio hirian pertsona gehiago egotearen errealitateari, izan ere, pertsona horiek ezin dituzte gutxieneko elikadura-premiak bete. "Donostiako eredua humanismoarena eta exijentziarena da", errepikatu du Jon Insausti alkateak, eta laguntza hori "etxerik gabeko pertsonen gizarteratzea eta laneratzea lortzeko" helburuaren baitan kokatu du. Insaustik azaldu duenez, "alternatiba ordenatu bat eskaintzen dugu, laneratzeko eta gizarteratzeko ibilbide indibidualizatuekin, eta segurua guztiontzat, bai otorduak jasotzen dituzten pertsonentzat, bai administrazioentzat, bai gainerako herritarrentzat".

Udal Gobernuak aurrekontu zuzkiduraren gehikuntza onartu du, milioi erdi eurotan hain zuzen ere; horietatik 229.500 euro 2026tik aurrera onuradunak handitzeko erabiliko dira, eta gainerakoa 2027an gauzatuko da. Alkateak azpimarratu du indartze hori posible dela Eusko Jaurlaritzaren dirulaguntza bati esker, eta "hiriaren erronkei aurre egiteko aliantzen garrantzia" azpimarratu du. Ekarpen berri honekin, etxerik gabeko pertsonak elikatzeko programak aurten 2 milioi euroko kopurua izango du. 

Altzaberriren hiri garapenerako tramiteak

Tokiko Gobernu Batzarrak  onartu du ere Altzaberriren hiri-garapenari aurre egiteko izapideak abian jartzea, donostiarrentzat 3.000 etxebizitza baino gehiago eraikitzeko asmoa duen ingurunean. Horrela, Udal Gobernuak Auditz Akular izeneko eremuko HAPOren aldaketa puntuala idazteko kontratazio-espedientea onartu du, 665.500 euroko lizitazio-aurrekontuarekin eta kontratuaren 22 hilabeteko iraupenarekin.