Familiarekin jolasean: jarduerak familian

Kultur Aniztasun Bulegoak Donostiako hainbat ikastetxetan Ongi etorri eskolara! egitasmoa bultzatzen du 2016-2017 ikasturtetik aurrera. Xedea eskola komunitatetik abiatuta, beste herrialde batzuetatik datozen familien inklusioa laguntzea eta eskolako eragile guztiak kultur aniztasunaren abantailez jabetzea da.

Hala, hainbat jarduera eta ekintza ari dira garatzen Donostiako bost ikastetxetan: Egiako Aitor ikastolan eta Mª Reina eskolan, Intxaurrondoko Hegoa ikastolan eta Intxaurrondo ikastolan, eta Gros auzoko Zuhaizti ikastetxean, hain zuzen ere.

Egitasmoaren zutabe nagusiak honakoak dira: eskolako guraso, irakasle eta ikasleentzako sentsibilizazioa, beste jatorri batzuetako familiei laguntza, harrera protokoloaren diseinua, eta familia horiek euskarara eta Donostiako kulturara hurbiltzea.