Hemen Urumea, ibaia ezagutzeko bisita gidatuen programa bat

Prestatutako programa 2023ko maiatzetik urrira gauzatuko da

Donostiako Udalak eta Cristina Enea Fundazioak abian jarriko dute bisita gidatuen programa bat, herritarrek Urumea ibaia ezagutu dezaten.

Prestatutako programa 2023ko maiatzetik urrira gauzatuko da, eta, horren barruan, bisitak egingo dira ibaiaren ibilguan zehar, ontzian, kanoan, bizikletaz edo oinez. Bidaiariekin batera, gidari aditu batzuk joango dira beti, Urumeari buruzko informazioa emateko: historia, ibaiaren dinamikak, fauna eta flora, e.a.

Ekimena osatzeko, Urumeari buruzko bi film dokumental emango dira, eta bi bisita gidatu egingo dira hiriko urak kudeatzeko erabiltzen diren azpiegituretara, ekaitz-tangetara.

Urumea hobeto ezagutu

Cristina Enea Fundazioak eta Donostiako Udaleko Urak Ustiatzeko eta Saneamenduko Zerbitzuak antolatutako bisita-programa honen helburua da Urumea hobeto ezagutzen laguntzea eta haren suspertze soziala bultzatzea, eta, horretaz gain, saneamenduaren udal-kudeaketa agerian jartzea, uren ingurumen-kalitatea nabarmen hobetzea lortu baitu.

Marisol Garmendia Ekologiako zinegotziak esan duenez, ibaiak "gure hiria zeharkatzen du, hegoaldetik iparraldera, eta protagonista nagusietako bat da gure eguneroko bizitzan; hala ere, Urumea ezezagun bat da oraindik donostiar gehienentzat. Itsasora begiratu izan dugu beti, ibaia bigarren planoan izanik. Herritarrek Urumea ibaiak dituen aberastasuna, garrantzia eta biodibertsitatea ezagutzeko garaia iritsi da."

Erlazionatutako dokumentuak

• Hemen Urumea. Ibaia ezagutzeko bisita gidatuen programa bat.pdf