Herrerako geltokiko igogailua uda baino lehen egongo da martxan

Renfek Udalari baieztatu dio igogailua konpontzeko lanak eta ingurua hobetzeko lanak egiten ari direla

Renfek Donostiako Udalari baieztatu dio Herrerako geltokiko igogailua martxan jartzeko lanak aurreikusitakoaren arabera egiten ari direla, eta gutxi gorabehera bi hilabeteko epean jarri ahal izango dela martxan. Hala ere, esku-hartzea igogailua konpontze hutsetik harago doa, eta estazioaren inguruan dauden akatsak hobetzeko eta konpontzeko hainbat jarduketa biltzen ditu, horietako batzuk dagoeneko eginak.

Udalak hainbat hilabetez erreklamatu ondoren, Renfek jakinarazi du lanak martxan daudela. Lan horiek geltokiari lotutako erabilera publikoko elementuak Udalari laga aurreko prozesuaren barruan sartzen dira.

Igogailua konpondu eta doitzeaz gain, Renfe eskaileretan, pasabideetan, argiztapen-elementuetan, estalduretan eta barandetan konponketak egiten ari da, bai eta udal-langileek eta trenbide-operadoreak elkarrekin egindako bisita teknikoan antzemandako hainbat kalte zuzentzen ere.

Igogailuari dagokionez, kalte bandalikoak konpontzeaz eta nahitaezko berrikuspen teknikoaz gain, doikuntzak egingo dira lotutako instalazioetan, segurtasun-sistemetan eta etorkizunean behar bezala mantentzeko behar diren elementuetan.

Lanak amaitu ondoren, Udalak instalazioen funtzionamendu egokia egiaztatuko du lagapena formalizatu aurretik. Une horretatik aurrera, erabilera publikoko elementuen kontserbazioaz, mantentze-lanez eta funtzionamenduaz arduratuko da; aldiz, trenbide-administratzaileak jarraituko du egiturazko eta trenbide-azpiegituretako erantzukizunak bere gain hartzen.

Era horretan, Herrera auzoko bizilagunentzat bereziki zaila izan den aldi bat amaituko da, azken hilabeteetan irisgarritasunerako funtsezko elementurik ez dutelako izan. Instalazio guztien gaineko jarduketa zabalago horrekin, nabarmen hobetuko dira geltokiaren inguruko segurtasun-baldintzak, irisgarritasuna eta eguneroko erabilera.