Lagunkate ekimenaren bigarren dei txanda bati ekin dio Udalak

Lehen fasean, 65 urtetik gorako 23.655 pertsonekin harremanetan jartzeko aukera izan du Udalak

Donostiako Udalak, Lagunkate ekimenaren bidez, bigarren dei txanda bati ekin dio, lehenengo fasean kontaktatutako 23.655 pertsonetatik jarraipena jaso nahi izan duten 2.000 adinekoei dei egiteko.

Duela aste batzuk, Donostiako Udalak Lagunkate proiektua jarri zuen martxan, bakarrik edo beste pertsona zaharrago batekin bizi diren 65 urtetik gorako pertsonengana hurbiltzeko, nola zeuden jakiteko eta konfinamendu-egoeraren ondorioz sor daitezkeen zailtasunak atzematen saiatzeko.

Deien bigarren fase honetan, nolabaiteko higadura eta emozioa azaleratzen ari dela antzematen da; izan ere, laguntzarik behar ez izan arren, isolamenduak eta distantzia fisikoak tristura-sentimenduak eragiten dituzte, eta, kasu askotan, pertsona horien larritasuna eta ziurgabetasuna ere bai, aurreko errutinetara itzultzeko gai izango al diren zalantzak agertzen baitira.

Era berean, ikusten ari da batzuetan angustia gaixotasun eta ezgaitasun egoerekin lotuta dagoela, eta horiek areagotu egiten dutela konfinamendu egoera honetan.

Lehen fasearen datu batzuk

Eragin positiboa

Datu kuantitatiboez gain (ikusi ohar osoa esteka honetan), deiak egiten ari diren pertsona-taldeak hauteman du deiak eragin positiboa izan duela, bai deia jaso duten pertsonengan, bai haien hurbileko inguruneetan; izan ere, segurtasuna ematen die jakitea laguntza eta zainketa behar izanez gero Udalari dei diezaioketela.

Udaleko langileek egindako lana Euskadin, Gipuzkoan eta zehazki Donostian egoera bereziki ahulean dauden pertsonei laguntzeko baliabideak eskaintzeko lanean eta antolatzen ari diren milaka pertsonei gehitu zaie. Pertsona horiei guztiei, Udalak eskerrak eman nahi dizkie Donostia hiri konprometitua, solidarioa eta zaintzen dakiena dela baieztatzeagatik.

Deialdia

Lagunkateren deia jaso beharko zuen baina jaso ez duen senide, lagun edo bizilagunen bat duten pertsonei Udalarekin harremanetan jartzea eskatu nahi die Udalak, 010 zenbakiaren bidez, litekeena baita eguneratua ez dagoen 2.618 kontaktu horietako bat izatea.

Erlazionatutako dokumentuak

• Lagunkate ekimenaren bigarren dei txanda bati ekin dio Udalak.pdf