Amarako bertakoek beste TAO eremuetan aparkatu ahal izango dute Anoetako ekitaldi egunetan

Errondon motorrentzako aparkalekua egiteko proiektua lizitazioaren zain dago

Donostiako Udalak 5-1 Amara TAO sektoreko bertakoei 1-2 Erdialdea, 1-5 Morlans, 5-2 Loiolako Erriberak eta 5-3 Loiola sektoreetan aparkatzeko baimena emango die estadioan ekitaldiak egiten diren egunetan, Anoeta pasealekua zirkulaziorako eta aparkaleku orokorrerako erabat ixten denean.

Baimen hau indarrean sartuko da ekitaldia egin aurreko eguneko 00:00etatik, ekitaldia egin eta hurrengo eguneko 23:59ak arte. Bertakoek xede-sektorean baimendutako egoiliarren baldintza berberetan aparkatu ahal izango dute.

Olatz Yarza Mugikortasun eta Garraio Jasangarriko zinegotziak nabarmendu duenez, bere departamentua "etengabe ari da lanean Anoetako ekitaldietan auzora ibilgailu asko etortzeak eta aparkalekuak mugatzeak Amara Berriko bizilagunei eragiten dien eragozpenak murrizteko irtenbideak bilatzeko".

Yarzak gaineratu duenez, "neurri honekin, Errondoko berrurbanizazioarekin batera, motorrentzako aparkaleku bat eta egoiliarrentzako plaza berriak jartzeko, auzoan bizi diren pertsonen eta inguruan egiten diren ekitaldietan parte hartzen dutenen arteko bizikidetza errazteko alternatibak eskaintzen saiatzen gara".

Motorrentzako aparkalekua eta bertakoentzako plazak

Neurri horrez gain, Udalak 45 TAO aparkaleku berri sortzea aurreikusten du Aita Donostia eta Karlos I hiribidearen arteko Errondo pasealekuko erdibitzailearen ondoan. Josean Gasca kiroldegiaren ondoko aparkalekuarekin gertatzen zen bezala, motorrentzako 220 plazatan bihurtuko dira partidu egunetan.

Proiektua idatzita, onartuta eta lizitazioaren zain dago, eta 160.705 euroko aurrekontua du esleituta.

Garraio publikoa eta bizikletak

Neurri hauek hartzen diren arren, Udalak gomendatzen du garraio publikoa lehenestea Anoetan jokatzen diren kirol-ekitaldietara joateko, bai eta mugikortasun aktiboko beste garraio batzuk ere, hala nola bizikleta. Izan ere, 250 bizikleta eta patineteentzako aparkaleku segurua eta doakoa dago partidu egunetan Amara Berri ikastetxeko patioan kokatuta.