Martxan da indarkeria sexista prebenitzeko Beldur Barik lehiaketa

Proiektu artistikoak azaroaren 5era arte aurkeztu daitezke

Udaleko Donostia Gazteriak eta Berdintasunak “Beldur Barik” jarrera sustatzeko tokiko lehiaketa zabaldu dute. Hala, indarkeria sexista eta matxistaren manifestazio anitzak ikusarazten dituzten taldekako proiektu artistikoak aurkezteko aukera izango dute 12 eta 26 urte bitarteko gazteek azaroaren 5era arte www.beldurbarik.eus webgunean.

Lehiaketaren xedea da emakumeek jasaten duten bereizkeria egoerei aurre egiten dioten neska-mutilen
arte adierazpen motak bultzatzea. Lanak errespetuan, berdintasunean, askatasunean, autonomian, erantzukizunean eta indarkeria sexistaren gaitzespen irmoan oinarritutako jokabide eta jarrerak izan behar dira. Horrenbestez, “Beldur Barik” proiektuek hau erakutsi behar dute: emakumeen aurkako indarkeria mota guztiak gainditzeko, eta harreman askeak, errespetuzkoak, parekideak, anitzak eta ez-sexistak eraikitzeko konpromiso pertsonal eta kolektiboa.

Lehiaketan edozein adierazpen artistiko onartuko da, baldin eta euskarri digitalean aurkezten bada: flashmob, errezitatutako poemak edota kameraren aurrean irakurritako hausnarketazko testuak, bideoklipak, argazkiak, fotonobelak, lipdubak, dantzak, etab.


Zer balioetsiko da
Lanen balorazioan honako hauek hartuko dira kontuan: mezuaren kalitatea (nesken ahalduntzetik gogoetak eta eztabaidak sortzeko gaitasuna, eta mutilen konpromisoa matxismoaren aurka); originaltasuna; begiraden irekiera gazteek beraien egunerokoan bizi dituzten indarkeriaren adierazpenak identifikatzerako orduan; aurkeztutako irtenbidearen ikuspegia eta tonua; eta, euskararen erabilera.


Kategoriak eta sariak
Lehiaketaren hiru kategoriak adinean oinarritzen dira:
1. kategoria: 2006an eta 2007an jaiotakoak (2019an 12 edo 13 urte beteko dituztenak).
2. kategoria: 2001 eta 2005 bitartean jaiotakoak (2019an 14-18 urte beteko dituztenak).
3. kategoria: 1993 eta 2000 bitartean jaiotakoak (2019an 19-26 urte beteko dituztenak).

Sariei dagokienez, lehenengo eta bigarren kategorietan honako hau irabaziko dute: tokiko lehiaketan hirian ospatuko den kirol ekitaldi edo ekitaldi kultural batera joateko sarrerak. Azkenik, hirugarrenean, 300€.

Epaimahaikideen emaitza azaroaren 22an emango da ezagutzera sari banaketa ekitaldian.

“Beldur Barik” programak 10 urte
Aurten, “Beldur barik” programaren 10.urteurrena da. BERDINSAREA izeneko sarearen barruan sortu zen 2009an. Gaur egun, Emakunde-Emakumearen Euskal Erakundeak antolatzen du, Berdinsarea-Eudelen eta Araba, Bizkaia eta Gipuzkoako Foru Aldundien bultzadarekin batera. Gainera, Eusko Jaurlaritzako Hezkuntza Sailaren, Euskal Herriko Unibertsitatearen (UPV-EHU) eta EITB-ren laguntza dauka.

Euskal Autonomia Erkidegoko udalek, azaroaren 25eko ospakizunen harira, Emakumeenganako Indarkeriareko Aurkako Nazioarteko Eguna dela eta, elkarlanean antolatzen dituzte era batera antolatutako kanpainak.

“Beldur barik” programaren ekintzen artean lehiaketa dago, eta Erkidego mailako lehiaketaz gain, udalek tokiko lehiaketak antolatzen dituzte.

Informazio gehiago eta oinarriak.