Garapenerako Lankidetzako eta Hezkuntzako Kontseilua sektorez sektoreko partaidetza organoa da, eta Lankidetzaren eta Garapenerako Hezkuntzaren arloko printzipioak eta jarduerak bultzatzen ditu udalerrian, giza garapen sostengagarriaren ikuspegitik.

Garapenerako Lankidetzako eta Hezkuntzako Kontseiluaren aurrekariak 1996. urtean kokatu behar dira.

Dena dela, Nondik Nora partaidetza prozesua (2003-2005) gauzatu eta gero erabaki zen Kontseilua berrabiatzea lehentasuntzat hartzea, eta araudi berri bat, denon artean kontrastatua eta adostua, ezartzea. Partaidetza prozesu horretan, garai hartan lankidetzan aritzen ziren Donostiako erakunde guztiek esku hartu zuten, helburu honekin: Udalaren lankidetza politika hobetzeko lehentasunezko lan ildoak denon artean ezartzea.

Azkenik, formalki berrabiatu zen eta 2008an funtzionatzen hasi zen Lankidetza eta Garapenerako Hezkuntzako Udal Aholku Kontseiluaren arautegian oinarrituta, 2008ko otsailak 26an aprobatua izan zena eta urte bereko apirilaren 2an GAOn argitaratutakoa.

Gai honetan esku hartzen duten eragile politiko eta sozialen ustetan, Udalak lankidetzaren eta garapenerako hezkuntzaren arloan egiten duen lanak Iparraren eta Hegoaren arteko harremanak aldatzeko prozesu egiturazko bat bultzatu behar du, planeta honetako emakume eta gizonentzat baliagarri den giza garapen sostengagarriaren ikuspuntutik. Baina hori gauzatu ahal izateko, ezinbestekoa da herritarrek, bai Iparraldekoek bai Hegoaldekoek, kontzienteki parte hartzea, eta gero eta antolatuago eta sendoago izatea eragile aktibo gisa. Gizarteak eraldaketa sozialaren protagonista izan behar du. Planteamentu horrek beharrezko egiten du, besteak beste, mekanismoak ezartzea gizarte zibilari aukera emateko lankidetzaren eta garapenerako hezkuntzaren arloko udal politiketan parte har dezan. Asmo horrekin sortu zen udal kontseilu hau, eta asmo horri eusten dio bere funtzionamenduan.

Kontseilua Udalak duen erreferentzi esparrua da, helburu duena, besteak beste, herritarrek parte hartzea lankidetza arloko udal politikak gauzatzean. Haren bidez, politika horiek kudeatzeko modua aditzera ematen da, haien motorea den oinarri ideologikoaz gogoeta egiten, jarduteko ereduak proposatzen eta segimendua ere egiten da.