Urriak 3: trafikoa guztiz moztuta Amara Berrin

Urriaren 3an, 18:45ean, Reale Arena estadioan jokatuko den Real Sociedad eta Anderlecht futbol taldeen norgehiagoka arrisku handiko partida izango dela ohartarazi dute Ertzaintzak eta Udaltzaingoak.

Udalaren eta segurtasun operatiboaren arduradunek dei egin dute:

• garraio publikoa erabiltzea
• estadiora garaiz iristea
• Amarako auzotarrei zein hiriko beste auzoetako bizilagunei eskatu diete kontuan hartzeko neurriok euren egunerokotasunean izan ditzaketen eraginak

Itxiera perimetrala

Ohiko segurtasun neurriez gain, dispositiboa indartuko da eta 16:30etik 19:00etara Amara Berri auzoko zati bat eta Anoeta estadioaren ingurua trafikoari guztiz itxita egongo da.

Segidako kaleetan trafikoa guztiz moztuta egongo da:

• Hegoaldea: Zorroaga pasealekua – Aita Donostia plaza – Errondo pasealekua (bide hauetan trafikoa moztuko da Portutxo biribilgunean eta Toribio Alzaga eta Zorroaga pasealekuaren arteko biribilgunean)
  
• Iparraldea: Pío XII plaza - Eustasio Amilibia
  
• Mendebaldea: Carlos I.aren hiribidea
  
• Ekialdea: Felipe IV – Irun Plaza – Baleazaleak
  
• Begiristain Doktorearen pasealekua: Aita Donostia plaza eta Ospitalerainoko zatia

• Larrialdietako ibilgailuak, garraio publikoa, mugikortasun urriko pertsonak eramaten dituzten ibilgailuak edo Osakidetzako etxez-etxeko asistentzia zerbitzuak igaro ahal izango dira.
  
• Garraio publikoak, Madrilgo hiribidetik ibili ahal izango da bi norabideetan, baina ordu horietan Isabel II eta Aita Donostia plazaren artean, bi norabideetan, dauden geltokiek ez dute zerbitzurik izango.
  
• Itxieraren barruan aparkatuta dauden ibigailuren bat mugitu beharko balitz, ibilgailu horiek Pio XII plazatik aterako dira.
  
• Ospitalera joan behar duten hiritarrei aholkatzen zaie GI-40 errepidea erabiltzea.

Garrraio publikoa

Zerbitzu bereziak eskainiko dira:

• Dbus
• Euskotren
• Lurraldebus

Kultur Etxea

Ernest Lluch Kultur Etxea urriaren 3an arratsaldez itxita. Beraz, ordutegia goizez bakarrik izango da: 10:00 - 14:00.

Amara Berriko bizilagunak

5-1 Amara sektoreko TAO baimena duten egoiliarrek, urriaren 2tik 4ra, biak barne, libreki aparkatu ahal izango dituzte haien ibilgailuak 1-2 Erdialdea, 1-5 Morlans, 5-2 Loiolako Erriberak eta 5-3 Loiola sektoreetan. Sektore horietan, TAOko titularrei aplikatzen zaizkien baldintza berberak aplikatuko zaizkie. Hala ere, egoiliar horiek ezin izango dute doan aparkatu nahitaezko ordainketa eremuetan (15 eremuetan), ezarritako erregulazio ordutegiaren barruan.

Dena dela, segurtasun arduradunek hiritarrei eskatu diete, ahal duten heinean aipatutako eremu perimetralera ez hurbiltzeko, ordezko bideak erabiltzeko eta egingo diren sarrerak eta irteerak denborarekin planifikatzeko.

Beste hainbat neurri

Gainera, gogorarazi dute kirolaren bortizkeriaren, arrazakeriaren, xenofobiaren eta tolerantzia ezaren aurkako Legeak kirol-instalazioetan edo inguruetan bengalak eramatea edota erabiltzea debekatzen duela, eta bide publikoan erabiltzeak ere Hiri Segurtasuna Babesteko Legea erabilita zigortu daitekeela, betiere baldin eta arau-hauste penalik ez badago.