Loiolako kale nagusien noranzkoa aldatuko da uda amaieran

Tokiko Gobernu Batzarrak onartutako beste gai batzuk: Estolderia, Familientzako arreta psikosoziala

Tokiko Gobernu Batzarrak hiriko kale eta bideen zoladurak konpondu, berritu eta mantentzeko zerbitzuen kontratuaren bigarren aldaketa onartu du, UTE Goki enpresari esleitutakoa. Aldaketa horri esker, Loiola auzoko hainbat kaleren zirkulazioaren noranzkoa aldatuko da, 79.999 euroko aurrekontuarekin.

Aldaketa hori Lorategi Hiriko urbanizazio berriak eragin du, Aralar Mendilerroa kalearen eta bertan amaitzen diren kale batzuen zirkulazioaren noranzkoa aldatu behar baita, auzoko ibilgailuen ibilbideak hobetzeko.

Hala, auzorako beste sarrera bat jarriko da hegoaldean, Kuartelen biribilgunetik sartuta, Aralar Mendilerroa kaleak Loiolako Zeharbidearekin eta Urdinzuko zubiarekin bat egiten duen tokian, Aralar Mendilerroa kalea eta Urbia kalea norabidez aldatuz. Gainera, auzoko barne-trafikoaren zirkulazioa berrantolatuko da, eta horrek Zubiondo, Urbasa mendilerroa eta Plazaburu kaleetako martxaren noranzkoak aldatzea dakar.

Kontratu-aldaketa horretan, gainera, hiriko hainbat puntutan irisgarritasuna hobetzeko lanak egitea sartu da. Horrela, irisgarritasunari buruzko arauetara egokitu nahi dira gaur egun irisgarriak ez diren edo arau horiek betetzen ez dituzten oinezkoen 16 pasabide, eta, gainera, haien segurtasuna hobetu nahi da.

Estolderia

Tokiko Gobernu Batzarrak onartu du Aquambiente Servicios para el Sector del Agua SA enpresari esleitzea udal estolderia sareko isurketak garbitu, ikuskatu eta kontrolatzeko kontratua. Kontratu honek 10 urteko egikaritze-epea du eta urteko aurrekontua 2.935.156 eurokoa da, gehi 77.000 euro aparteko zerbitzuetarako eta 48.400 euro saneamenduaren konponketa txikietarako materialerako.

Kontratuaren xedea Udal Estolderia Sarea osatzen duten hodiak eta elementuak garbitzeko zerbitzua da, estolderia-sarea zerbitzu eraginkorreko egoeran mantentzeko. Hauek ere kontratuaren xede dira:

• TV bidez edo beste bitarteko batzuen bidez hodiak ikuskatzea,
• saneamendu-sarera egindako isurketen kontrola, hornidura,
• saneamendua kudeatzeko plataforma bat ezartzea, parametrizatzea eta mantentzea,
• Saneamenduko Informazio Geografikoko Sistema (GIS) eguneratzea eta mantentzea, eskura dauden formatuetan.
• eta beste lan batzuk.

Familientzako arreta psikosoziala

Tokiko Gobernu Batzarrak kalteberatasun-egoeran edo babesgabetasun-arrisku arinean edo ertainean dauden adingabeak dituzten familientzako gizarte- eta hezkuntza-arretako eta arreta psikosozialeko zerbitzua kontratatzeko espedientea onartu du. Lizitazioaren urteko oinarrizko aurrekontua 1.963.918 €-koa da, eta kontratuaren hasierako iraupena 2 urtekoa izango da (bi luzapen egiteko aukerarekin, bakoitza urtebetekoa).

Zerbitzu honen bidez, beren testuinguru soziofamiliarrean honako egoera hauetakoren batean dauden adingabeak dituzten familien beharrei eta eskaera sozialei erantzun nahi zaie: kalteberatasuna edo babesgabetasun arina edo moderatua izateko arriskua.

Garatzen diren jarduerak pertsonen segurtasuna eta babesa bermatzen duen arretan oinarritu beharko dira, bai eta pertsonen autonomia indartuko duen arreta integral batean ere, beren baliabideak eta ingurune komunitarioko baliabideen erabilera indartuz.