Donostia aurrera doa Añorgako Geltokian 248 etxebizitza eraikitzeko izapideetan

Tokiko Gobernu Batzarrak onartutako beste gai batzuk: Herrerako futbol zelaia, Olaetako parkearen estalkia, Autokarabanen aparkalekua

Tokiko Gobernu Batzarrak hasierako onarpena eman dio Añorgako Geltolkia hirigintza eremua urbanizatzeko proiektuari. Proiektua jendaurrean jarriko da hogei eguneko epean, behin betiko onartu baino lehen.

Jon Insausti alkateak nabarmendu duenez, "hau da Añorgako Geltokia hirigintza-garapen berria eraikitzen hasteko azken administrazio-izapidea, eta horri esker, 248 etxebizitza berri gehitu ahal izango dizkiogu hiriari, horietatik 96 babes sozialekoak edo tasatuak. Eta, gainera, ingurunea nabarmen berroneratuko da, eremu hori Añorga Txikiko gainerako eremuekin integratuz, errekaren ondoan aisialdirako berdegune bat sortuz, bide-konexioak hobetuz, garraio publikoarekin lotura hobeak eginez, baita auzoaren irisgarritasuna erraztuko duen igogailu berri bat sortuz ere".

Insaustik azaldu duenez, garapen hori "udal gobernu honek etxebizitzaren arazoa arintzeko duen lehentasunezko estrategiaren barruan kokatzen da, donostiarrek hirian bizitzeko proiektuak garatzeko aukerak sortuz".

Eremu berrirako proposatutako antolamendu-zatiari dagokionez, Añorga errekaren eta topoaren bideen artean egongo da, batetik, eta Añorga hiribidearen artean, bestetik. Espazio horretan, 5 etxebizitza-eraikin, Añorga errekastoaren erriberako parke-eremu bat, aparkaleku bat eta oinezkoentzako hainbat plaza eta aisialdirako gune eraikitzea aurreikusten da.

Añorga etorbideari dagokionez, planteatu da egungo bide-egiturari eustea. Hala ere, berrurbanizazio osoa egingo da espaloi zabalagoak, aparkaleku antolatua eta zoladura eta hiri-zerbitzu berriak jarriz.

Proiektuaren aurrekontu-balorazioa 10.427.946 eurokoa izango dela kalkulatu da, eta aurreikusitako egikaritze-epea 18 hilabetekoa izango dela. Hala ere, urbanizazio-obren aurrerapenak lotura estua izango du eraikuntza-obren aurrerapenarekin, faseka planteatzen baita, eta, beraz, epe hori baldintzatu liteke.

Herrerako futbol zelaia

Tokiko Gobernu Batzarrak Herrerako futbol zelaia birmoldatzeko proiektua onartu du, 3.048.936 euroko aurrekontuarekin eta 7 hilabeteko egikaritze epearekin.

Proiektuaren helburua Herrerako futbol-zelaia osorik birmoldatzea da, gaur egun hondatuta dauden kirol-instalazioak berreskuratzeko eta horiei balioa emateko. Proiektua bi fasetan banatzen da:

• I fasea: jokalekuari dagokiona
• II fasea: aldagelak eta harmailak egokitzea

Proiektatutako esku-hartzearen barruan sartzen da dagoen soropil artifizialaren ordez bosgarren belaunaldiko betelanik gabeko sistema bat jartzea. Sistema hori bere iraunkortasunagatik, mantentze-lanen murrizketagatik eta hondakin plastikoak sor ditzaketen betelanetarako materialik ezagatik nabarmentzen da.

Ureztatze- eta drainatze-sistema eta argiztapen-instalazioa erabat berrituko dira. Urbanizazio perimetral berri bat egingo da, eta, bertan, zoladurak, landa-itxitura berria eta aparkalekutik iristeko moduko arrapalak sartuko dira. Era berean, zelaiaren sarrera zaharraren arkuzko egituraren ingurua garbituko da, sarrera horren sinbolo historikoa baita.

Harmailetako euste-hormari atxikita dauden gaur egungo aldagelak erabat eraitsiko dira. Aldagela berrien oinplanoko eskema luzetarako izango da, tribunaren hormari atxikita, eta sarrera nagusia egungoaren alde berean egongo da. 6 aldagela egingo dira, luzetarako erdiko korridorearen alde banatan 3, sarrera errazteko.

Olaetako parkearen estalkia

Tokiko Gobernu Batzarrak Olaeta plazan ehunezko estalkia jartzeko proiektua onartu du, 253.706 euroko aurrekontuarekin eta gehienez 5 hilabeteko epearekin.

Proiektua 2023ko partaidetzazko aurrekontuen prozesutik dator, eta bigarren proposamen bozkatuena izan zen, 830 botorekin. Proiektuaren kokalekua Olaeta plaza da, Amara Berri ikastetxearen sarreraren parean. Bertan, gaur egun, haur-parkea, berdeguneak eta kirol-kantxa txiki bat daude.

Estalkiak haurrentzako jolas-gunea babestu nahi du, eguraldi txarretik babesteko. Oinplanoan trapezio forma duen ehunezko estalkia proposatzen da, lehendik dagoen urbanizazioarekin bat datorrena.

Autokarabanen aparkalekua

Tokiko Gobernu Batzarrak onartu du "Igarako Bidean (243 eta 374 partzelak) autokarabanen aparkalekua ezartzeko lurrak mugitzeko eta urbanizatzeko proiektua" hirigintza planeamenduarekin bat datorrela eta hura garatzeko kokalekua egokitzat deklaratzea. Bestalde, interes publikoa ekimenean parte hartzen duela deklaratzea ere onartu du. Era berean, espedientea Gipuzkoako Foru Aldundira bidaltzea onartu da, interes publikoko deklarazioaren ondorioetarako.

Bai proiektu hau gauzatzea, bai kokapena, hiriarentzat interes berezikotzat jotzen dira, autokarabanentzako 85 aparkaleku-plaza espezifiko gehituko bailituzke, beste ingurune batzuen gaineko presioa arinduko luketenak.