MUSIKALEAN 2024: Musikak kaleak hartuko ditu Santa Zezilia ospatzeko

Donostiako Udalaren Musika eta Dantza Eskolak Santa Zeziliaren omenezko saxofoi kontzertu batekin argituko ditu kaleak

Donostiako Udalaren Musika eta Dantza Eskolak gogotsu iragarri du MUSIKALEAN 2024 ekimenean parte hartuko duela, Euskal Herriko Musika Eskolen Elkarteak (EHME) bere hamazazpigarren edizioan Santa Zeziliaren omenez antolatzen duen ekimenean. Urteroko hitzordu horretan Euskal Herri osoko 49 musika eskolek hartuko dute parte, eta 2500 ikasle eta irakasle baino gehiagok kaleak musikaz eta kolorez beteko dituzte, eguneroko espazioak agertoki bizi bihurtuz azaroaren 18tik 24ra.

Aurten, Donostiako Udalaren Musika eta Dantza Eskolak MUSIKALEANekin bat egingo du kontzertu berezi batekin, azaroaren 21ean, 19:00etan, Atotxako egoitzaren sarreran. Judith Montero eta Ibon Irijoaren zuzendaritzapean, saxofoiko 25 ikaslek errepertorio anitza eskainiko dute, Santa Zezilia musikarien zaindariaren omenez eta bere dedikazio eta talentuaren erakusgarri.

Emanaldia Saxofoi Taldeak irekiko du Karen Street-en Avalon Suite-arekin eta Henry Manciniren The Pink Panther enblematikoarekin, saxofoiaren soinu aberastasuna goraipatzen duen piezarekin hain zuzen ere. Ondoren, SaxBass boskoteak Ennio Morriconeren pieza ezagunen egokitzapen berri bat interpretatuko du, Marina Ramos eskolako ikasleak moldatua. Jarraian, saxofoi ensembleak Jacob de Haanen Holiday in Ireland eta Marvin Hamlischen Theme from "Ice Castles" interpretatuko ditu.

Kontzertua amaitzeko, Saxofoi Txiki Taldeak The March of the Women joko du, mugimendu sufragistaren ereserki historikoa, 1910ean Ethel Smyth emakume konpositoreak konposatua. Obra hau, bere garaian ereserki gisa deskribatu zen eta, era berean, borrokarako deia egiten duen kantu gisa, emakumeek beren eskubideen defentsan egiten duten ahalegina sinbolizatzen du, eta borroka honen historia musikalean funtsezko pieza da.

MUSIKALEANek, musikaren ospakizuna izateaz gain, musikarien, herritarren eta hiri-espazioen arteko topagunea sortu nahi du, artearen eta eguneroko bizitzaren arteko lotura sendotuz. Gainera, aukera paregabea da gazteek ingurune publiko batean jotzeko emozioa senti dezaten, lankidetza, adierazpen artistikoa eta musikaz gozatzea bezalako balioak sustatuz, giro hurbil eta inklusiboan.

Informazio gehiago: www.donostiaeskola.eus