“Oporretan euskaraz” udalekuetan izena emateko epea zabalik ekainaren 3tik 8ra

Plazak zozketa publiko bidez eskainiko dira 64 talde osatu bitartean.

• Udaleko Euskara Zerbitzuak urtero uztailean egiten dituen Oporretan Euskaraz udaleku irekiak antolatzea erabaki du.
• Bertan parte hartzeko izena eman ahal izango da ekainaren 3tik 8ra.
• Izen-ematea online egitea gomendatzen da www.donostiaeuskaraz.eus edo www.donostia.eus helbideetan.
• Hala ere, Udaleko Euskara Zerbitzuaren bulegoan ere egin ahal izango da, Konstituzio plazaren 2an, 9:00-15:00 ordutegian.

Haurren segurtasuna lehentasuna izanik, haur bakoitzak nahitaez musukoa ekarri beharko du jantzita etxetik. Horrez gain, antolatzaileek beharrezkoak diren neurriak hartuko dituzte: tenperatura hartzea, eskuak garbitzea, distantzia soziala mantentzea, neurri berrira egokituriko jokoak eta jarduerak antolatzea eta abar.

Lehen hezkuntzako ikasleentzat (7-12 urte), goizez eta eskola eremuan

• 2020ko uztailaren 1etik 30era antolatuko diren udaleku irekietan 2008tik 2013ra bitartean (bi urte hauek barne) jaiotako haur donostiarrek parte hartu ahal izango dute.
• Taldeak 8-9 haurrez osatuko dira gehienez eta hizkuntza ereduaren, jaiotze urtearen eta jasotze puntuaren arabera eratuko dira.
• Aurreko edizioarekin alderatuta, 4-6 urte bitarteko haurrek ezingo dute parte hartu aurten, beraien segurtasuna bermatzeko baldintzak ez daudelako.
• Bestalde, aurten, 11 urteko langa gainditzea erabaki da eta urtebete zaharragoek ere, 12 urtekoek, izena eman ahal izango dute. Guztira, beraz, ia 600 haurrek parte hartuko dute Oporretan Euskaraz-en
• Hiriko zenbait auzotako 8 eskoletan antolatuko dira aurtengo udalekuak eta lau orduko iraupena izango dute: 09:00/09:30etik 13:00/13:30era. Haurren sarrera mailakatua izango da pilaketak saihesteko.

Plazak zozketa publiko bidez eskainiko dira 64 talde osatu bitartean. Antolatzaileak zozketa ahalik eta azkarren egiten saiatuko dira eta emaitzak webean jarriko dituzte.