HAPOa berrikusteko prozesuaren lehen bilera irekia martxoare 28an egingo da

Herritarrei irekitako saioa izango da, 19:00etan Udaletxean

Donostiako Udalak Hiri Antolamenduko Plan Orokorra (HAPO) berrikusteko prozesua hasi du, Aurrerapen fasean. Prozesu honetan herritarren partaidetzak zati handi bat izango du, informazio eta prestakuntza saioetan, kontsultetan, mahai sektorialetan eta herritarrak, elkarteak, teknikariak eta beste kolektibo batzuk deituta dauden beste dinamika ireki batzuetan zehaztua, eta Plan Orokor hau aberasteko ekarpenak egiteko aukera izango dute.

Lehenengo saioa datorren astelehenean, martxoak 28, arratsaldeko 19:00etan izango da Udaletxeko Pleno Aretoan eta Plan Orokorraren berrikuspenaren partaidetza fasearen hasiera izango da. Saio honetan parte hartuko dute, halaber, hiri plangintzan adituak diren bi arkitekto-urbanistak; Gabriel Chapa arkitekto-urbanista bizkaitarra eta Monica Beguer i Jornet katalana

Hortik aurrera, planteatuko diren dinamika irekien berri emango da behar den garaian, interesa duen orok Plan Orokorraren prozesuan parte har dezan.

Hiri Antolamenduko Plan Orokorra

Hiri Antolamenduko Plan Orokorra udalerriko lurralde osoa eta, horren barruan, hiria, antolatzeko oinarrizko tresna nagusia da.

Horrela, lurzoruen sailkapena ezartzeko eta, lehenik eta behin, lurraldearen egitura organiko osoa planifikatzeko balio du – Eremu desberdinak eta dagozkien sistema orokorrak definituz –, eta lurzoruen antolamendu eta eremuetan banatze xehatua ere ezarri ahal izango du, eraikuntza, jabetza eta erabilera baldintzak arautuz.

Gaur egungo Planak 12 urte daramatza indarrean, eta hiriaren testuingurua asko aldatu da ordutik; horregatik, beharrezkoa eta ezinbestekoa da plangintza tresna honen berrikuntza eta egokitzapena sustatzea.

Orain arte, Udalak plana berrikusteko oinarrizko lehen dokumentua, Plan Orokorraren Aurrerapena izenekoa, lizitatu eta idazketa talde bati eskatu dio. Une honetan, eta Hirigintza Jasangarriaren arloaren zuzendaritzapean, talde hori dokumentua lantzen ari da. Dokumentu horretan, Plan Orokorra egiteko irizpide orokorrak jasoko dira.

Aurreikuspenen arabera, urtebete barru Aurrerapen dokumentu hori amaituta egongo da, Udalak legealdia amaitu baino lehen jendaurrean jarri ahal izateko. Aurrerapena egin ondoren, hurrengo legealdirako geratuko da Plan Orokorra bera egitea, gaur egun indarrean dagoena ordezkatzeko.