Gabon hauetan argi eta soinu ikuskizun berria estreinatuko da Udaletxeko fatxadan

Proiekzioak izango dira arratsaldero ordu erdiro urtarrilaren 4ra arte

Bigarren urtez jarraian, Donostiako Gabonetan argi eta soinu (bideomapping) ikuskizuna egongo da. Aurten, Udaletxeko fatxadan proiektatuta.

"Gabonetako Sinfonia" du izena aurtengo bideomapping ikuskizunak. Gabonak ez dira leku guztietan modu berean ospatzen; izan ere, jai hauek ospatzeko adina Eguberri daude. Baina, zer gertatuko litzateke noizbait Eguberri guztiek bat egingo balute? Adibidez, zer gertatuko litzateke doinu bakar batek Gabonetako magia guztia, desio guztiak eta itxaropen guztiak bere baitan hartuko balitu?

Hala bada, Gabonetako Sinfonia esklusibo bat sortu da, okasiorako bereziki konposatua; eta, gainera, soinu banda gisa ere balioko du, Gabonetako magia bere distira osoan entzun dadin. Hiriko tradizio musikalari egindako omenaldia da. Musikaren bitartez, era guztietako efektu bisual zirraragarriak ikusiko ditugu lehen aldiz: soinuen kaxa magikoa, bizia hartzen duten jostailuak eta den-dena izozten duten neguko elur-bisutsak. Ikuskizun bat non musika eta fantasia batzen diren, hiriari paregabeko oparia egiteko: donostiar guztien jabetzakoa izango den pieza musikal bat.

Ordutegiak eta emanaldiak

Abenduaren 27tik (asteazkena) urtarrilaren 4ra arte (osteguna) gozatu ahal izango dugu ikuskizunaz, eta emanaldien ordutegia hau izango da: 18:30ean, 19:00etan, 19:30ean, 20:00etan, 20:30tan, 21:00etan eta 21:30ean.

Emanaldi bakoitzak 6 minutu iraungo du eta emanaldi batetik bestera itxaron beharreko denbora girotzeko musika eta argi jokoak izango dira.

Jarduera gehiago

Beste hainbat jarduera antolatu dira: Kontxako hondartzan haur eta gazteentzako ekitaldiak, Kursaalean Gabonetako parke zientifiko bat, Donostiako Orfeoiaren bi kontzertu Iesu elizan (Loiolako Erriberak) eta San Martzial elizan (Altza).

Erlazionatutako dokumentuak

• Gabon hauetan bideomapping berria estreinatuko da Udaletxeko fatxadan.pdf