Udalak 'Zure Hiria Zaintzen' programaren beste edizio bat jarri du martxan

Programaren helburua da haurrei hiria gerturatzea, eta herritar kritiko eta erantzunkide gisa duten parte-hartze aktiboa indartzea

Donostiako Udalak 'Zure Hiria Zaintzen' programaren beste edizio bat jarri du abian. Donostiak hiri hezitzaile gisa duen konpromisoa indartzen du ekimen horrek. Eredu horretan, hezkuntza, ikaskuntza formalaz haraindian doan zentzu zabalean ulertuta, udal-proiektu politikoaren funtsezko ardatz bat da: bertan, familiak eta eskolak funtsezko zeregina betetzen jarraitzen dute.

Hezkuntzako eta Gazteriako zinegotzi Iñigo Garcíak programaren balio pedagogiko eta soziala azpimarratu ditu: “Zure Hiria Zaintzen ekimenarekin, Donostiako haurrek betetzen duten funtsezko eginkizunaren balioa azpimarratu nahi dugu. Haiek dira, euren begirada garbi, bitxi eta kritikoarekin, hiria ikuspegi berrien arabera ulertzen laguntzen digutenak eta Donostiako etorkizuna ere haien eskuetatik igarotzen dela gogorarazten digutenak”.

Iaz, Amara Berriko 360 ikaslek parte hartu zuten programan. Edizio honetan, Egia auzoko 100 ikaslek hartuko dute parte, zehazki, Sagrado Corazón Mundaiz, Presentación de María eta María Reina Eskola ikastetxeetako LH5 eta LH6 mailetakoek.

Ekimena bi fasetan garatuko da

Lehenengoan, Hezkuntza Atalak Unitate Didaktiko bat landu du. Unitate hori ikastetxeetan lantzen ari dira dagoeneko, eta horrekin amaitzeko, udaletxera bisita gidatua egingo da, otsailaren 9an eta 10ean, 10:00etatik 11:30era.

Bigarren fasean, ikasleek ikasitakoan oinarritutako marrazkiak egingo dituzte, eta Cristina Enea parkeko erakusketa-aretoan jarriko dira ikusgai, martxoaren 25etik apirilaren 24ra.

Sariak

Lau sari kolektibo emango dira:

• teknika artistiko onenari
• eduki onenari
• goiburu onenari
• originaltasunari

hala, parte hartzen duten ikasgela guztiek sari horietako bat jasoko dutela bermatzen da.

Garcíak azpimarratu duenez, “proiektu honen bidez lortu nahi duguna da ikasleek euren hiria eta bertako erakundeak, historia zein balioak hobeto ezagutzea; eta ikasleen parte-hartze aktiboa eta arduratsua sustatzea, gaur egungo herritar gisa, ez etorkizuneko herritar gisa bakarrik. Haurrek hiria eurena ere dela sentitzen dutenean, zaindu, errespetatu eta eraldatu egiten dute”.

Programak hauen babesa du

• Chillida-Leku Museoa
• Cristina-enea Fundazioa
• Tabakalera
• Aquarium
• FCC