Donostia, Adinekoekin Lagunkoia diren Hiri eta Komunitateen Munduko Kongresuaren egoitza

Udalak 2026ko ekainean egingo den kongresua antolatzen duten gainerako erakundeekin (Imserso, Eusko Jaurlaritza eta Gipuzkoako Foru Aldundia) jarduteko protokoloa onartu du

Donostiako Udalak astearte honetan lehen urratsetako bat eman du OMEko Adinekoekin Lagunkoiak diren Hiri eta Komunitateen III. Munduko Kongresuaren egoitza gisa parte hartzeko. Kongresua 2026ko ekainaren 16an, 17an eta 18an egingo da.

Udal gobernuak Donostiako Udalaren, Imsersoren (kongresuaren antolatzailea), Eusko Jaurlaritzaren eta Gipuzkoako Foru Aldundiaren arteko Jarduera Protokolo Orokorra onartu du, kongresua antolatzeko lankidetzara bideratua. Hitzordua "Elkarrekin eraldatuz! Adinekoekin Lagunkoia Den Mundua – Konektatua, Bidezkoa eta Jasangarria Belaunaldi Guztientzat” lelopean egingo da.

Jon Insausti alkateak nabarmendu duenez, "Donostia mundu mailako kongresu honen egoitza aukeratzea ez da kasualitate hutsa, Udal honek adinekoen zaintzan eta arretan erreferente izateko egin duen ahalegina aitortzea baizik. Izan ere, gure hiriak urteak daramatza lanean biztanleriaren zahartzearen erronkari aurre egiteko, eta prozesu hori guztia laguntzen du, gure aitona-amonek bizitza bete bat bizitzeko behar duten laguntza guztia izan dezaten, beren ingurunean ahalik eta denbora gehien eta modurik onenean mantenduz".

"Eta Donostiak lehen mailako kongresuak antolatzeko eta ezagutza erakartzeko duen gaitasunaren aitorpena ere bada, sektore honetan kokapen estrategikoa izateko egin den lanari esker, hiriaren potentziala eta erakargarritasuna aprobetxatuz", azpimarratu du Insaustik.

Biltzarra Adinekoekin Lagunkoiak diren Hiri eta Komunitateen Munduko Sareak sustatutako jardueren parte da. Sare hori Osasunaren Mundu Erakundeak (OME) sustatu zuen 2010ean, biztanleriaren zahartze azkarrari erantzuteko, eta helburua mundu osoko hiriak, komunitateak eta erakundeak lotzea da, beren ingurunea duintasunez eta kalitatez zahartzeko leku hobea izateko ikuspegi komunarekin.

Donostia izan zen sare horri atxiki zitzaion Estatuko lehen hiria, eta, harrezkero, Donostia Lagunkoia plana garatu eta Dublingo Adierazpena sinatu du, zeharkako udal-estrategia sendotuz, zahartzen ari den gizarte batean, adin guztietarako Donostia bat eraikitzeak planteatzen dituen erronkei eta aukerei modu integratuan heltzeko.

Izan ere, Donostiak proiektu eta zerbitzu ugari ditu adineko donostiarren bizi-kalitatea hobetzeko, hala nola Donostia Lagunkoia bera, +55 programa, erretiratutako adinekoen elkarteei laguntzea, Goizaldiak eguneko arreta-zerbitzua edo Etxez Etxeko Laguntza Zerbitzua (adineko ahulenei zuzendutakoak), besteak beste. 2026an, Udalak 17.072.935 € bideratuko ditu adinekoen arretarako, aurrekontu osoaren % 42,09; hau da, 343,82 € inbertituko ditu 65 urtetik gorako donostiar bakoitzeko.

Bizikleten aparkalekua Bentaberrin

Udal gobernuak Antiguako Bentaberri plazan (Topoko geltoki berriaren ondoan) bizikletentzako aparkaleku bat jartzeko obren kontratazio espedientea onartu du, 116.014 euroko aurrekontuarekin eta 3 hilabeteko egikaritze epearekin.

Proiektuak lokalaren 88,34m2 erabilgarriak 56 bizikleta hartzeko prestatzea aurreikusten du:

• orraziko banaketa, alde batean altuera bikoitzeko 28 posturekin,
• erdiko gune bat, 22 posturekin altuera bakarrean (horietako 6 karga elektrikorako)
• eta kargo bizikletetarako gune bat beste aldean, 6 postu dituena.

Aparkaleku honek Dbizi Parking sistemaren barruan funtzionatuko du, bizikletentzako aparkaleku seguruen udal sarea, dagoeneko 198 plaza dituena autobus geltokian (110), Pio XII.ean (50) eta Loiolako zeharbidean (38), hiri osoko kaleetan banatzen diren 10.500 plaza inguruaz gain.